රාජකාරී හා පෞද්ගලික ජීවිතයේ සමබරතාවය තුළින් නිරෝගී නාවික හමුදාවක් නිරෝගී ජාතියක් ප්‍රවර්ධනය කිරීමේ අරමුණෙන් ශ්‍රී ලංකා නාවික හමුදාව විවිධ වු ක්‍රියාකාරකම් නිරන්තරයෙන් සිදු කරනු ලබන අතර, එහි එක් නව මානයක් ලෙස කඳු තරණය කිරීම සඳහා නාවික හමුදා පුද්ගලයින් උනන්දු කිරීම සිදු කරනු ලබයි. මේ අනුව, අධ්‍යක්‍ෂ ජෙනරාල් විදුලි හා විද්‍යුත් ඉංජිනේරුගේ පූර්ණ අධික්‍ෂණය යටතේ නාවික හමුදා විදුලි හා විද්‍යුත් ඉංජිනේරු දෙපාර්තමේන්තුව විසින් සංවිධානය කෙරුණු මධ්‍යම පළාතේ මාතලේ දිස්ත්‍රික්කයේ කරගහතැන්න කඳු තරණ අභ්‍යාසය 2025 මාර්තු මස 29 වැනි දින සාර්ථකව පැවැත්විණි.

2024/25 අන්තර් සමාජ දස සාමාජික කාන්තා රග්බි ශූරතාවය දිනාගත් නාවික හමුදා කාන්තා රග්බි කණ්ඩායම 2025 මාර්තු මස 25 වැනි දින නාවික හමුදා මූලස්ථානයේදී නාවික හමුදාධිපති වයිස් අද්මිරාල් කාන්චන බානගොඩ හමුවී රග්බි කුසලානය නාවික හමුදාධිපති වෙත ඉදිරිපත් කෙරිණි. එහිදී තෙවන වරටත් කාන්තා රග්බි ශූරතාවය නාවික හමුදාවට දිනාදීම අගයමින් රග්බි කණ්ඩායම වෙත නාවික හමුදාධිපති විසින් සුභ පැතුම් පිරිනමන ලදි.

ශ්‍රී ලංකා නාවික හමුදාවේ කැස්බෑ සංරක්‍ෂණ ව්‍යාපෘතිය මඟින් සංරක්‍ෂණය කරන ලද කැස්බෑ පැටවුන් හතලිස් දෙදෙනෙකු (42) සාගරයට මුදා හැරීම 2025 මාර්තු මස 25 වන දින ගිණිකොන නාවික විධානයේ පානම වෙරළ තීරයේදී සිදු කෙරිණි.

උතුරු මැද නාවික විධානයේ සුභසාධන පහසුකම් පුළුල් කිරීම වෙනුවෙන් ශ්‍රී ලංකා නාවික නෞකා ගජබා ආයතන පරිශ්‍රයේ පරිපාලන කටයුතු වෙනුවෙන් භාවිතාකල ගොඩනැගිල්ලක් නවීකරණය කර, නිවාඩු නිකේතනයක් ලෙස පරිවර්ථනය කර විවෘත කිරීම 2025 මාර්තු මස 21 වැනි දින උතුරු මැද නාවික විධානයේ ආඥාපතිගේ ප්‍රධානත්වයෙන් විවාත කෙරිණි.

ශ්‍රී ලංකාවේ ඇමෙරිකා එක්සත් ජනපද තානාපති කාර්යාලයේ ආරක්‍ෂක සහයෝගිතා කාර්යාල ප්‍රධානී වශයෙන් කටයුතු කරනු ලබන කොමාණ්ඩර් Sean Jin සහ එම කාර්යාලයේ ප්‍රධානී ලෙස පත්වීමට නියමිත ලුතිනන් කොමාණ්ඩර් Ros Lary, නිල හමුවක් සඳහා 2025 මාර්තු මස 26 වැනි දින නාවික හමුදා මූලස්ථානයේදී නාවික හමුදාධිපති, වයිස් අද්මිරාල් කාන්චන බානගොඩ හමු විය.

2025 මාර්තු මස 22 වැනි දින සැපයුම් හා සේවා අවශ්‍යතා සපුරා ගැනීම සඳහා දිවයිනට පැමිණි ජපාන සමුද්‍රීය ස්වයං ආරක්‍ෂක බලකායේ ‘MURASAME’ නෞකාව, සැපයුම් හා සේවා අවශ්‍යතා සපුරාගැනීමෙන් අනතුරුව අද (2025 මාර්තු 25) දිවයිනෙන් පිටත්ව යන ලද අතර, එම නෞකාව වෙත ශ්‍රී ලංකා නාවික හමුදාව විසින් නාවික හමුදා සම්ප්‍රදායානුකූලව සමුදීම, කොළඹ වරායේදී සිදු කෙරිණි.

ඒකාබද්ධ සමුද්‍රීය බලකායේ 150වැනි කාර්යය සාධක බලකායේ අණදෙන නිලධාරී, කොමදෝරු රොජර් වෝඩ් (Commodore Rodger Ward) ඇතුළු එම බලකායේ නිලධාරීන්ගෙන් සමන්විත ධූත පිරිසක් 2025 මාර්තු මස 22 වැනි දින සිට 26 වැනි දින දක්වා ශ්‍රී ලංකාවේ නිල සංචාරයක නිරත වන අතර, ඊට සමගාමීව එම ධූත පිරිස නිල හමුවක් සඳහා අද (2025 මාර්තු මස 24) නාවික හමුදා මුලස්ථානයේදී නාවික හමුදාධිපති වයිස් අද්මිරාල් කාන්චන බානගොඩ හමු විය.

එක්සත් ජාතීන්ගේ මත්ද්‍රව්‍ය සහ අපරාධ සම්බන්ධ කාර්යාලයේ ගෝලීය සමුද්‍රීය අපරාධ වැලැක්වීම් වැඩසටහන යටතේ ශ්‍රී ලංකා නාවික හමුදාව හා එක්ව සංවිධානය කරන ලද, නෞකා වෙත ප්‍රවිශ්ඨවීම, සෝදිසි කිරීම සහ අත්අඩංගුවට ගැනීමේ ක්‍රමෝපායන් පිළිබඳ කලාපීය උපදේශක පාඨමාලාවේ සහ කලාපීය සමුද්‍රීය නීති බලාත්මක කිරීමේ උපදේශක පාඨමාලාව ත්‍රීකුණාමලය විශේෂ යාත්‍රා බළඝණ මූලස්ථානයේදී සාර්ථකව පැවැත්වුණු අතර, එහි සහතික ප්‍රදානය ත්‍රීකුණාමලය Sober Island Resort හි දී 2025 මාර්තු මස 20 වැනි පැවැත්වීමට නාවික හමුදාව විසින් කටයුතු කෙරිණි.

ත්‍රිකුණාමලය නාවික හා සාගරික විද්‍යාපීඨයේ පැවති 36 වැනි කණිෂ්ඨ නාවික මාණ්ඩලික පාඨමාලාව සාර්ථකව නිමාවට පත්වූ අතර, එහි සහතිකපත් ප්‍රදානෝත්සවය නාවික හමුදාධිපති වයිස් අද්මිරාල් කාන්චන බානගොඩ ගේ ප්‍රධානත්වයෙන් සහ නාවික හමුදා නියෝජ්‍ය මාණ්ඩලික ප්‍රධානී හා නැගෙනහිර නාවික විධානයේ ආඥාපති රියර් අද්මිරාල් චින්තක කුමාරසිංහ ගේ සහභාගිත්වයෙන් 2025 මාර්තු මස 22 වැනි දින නාවික හා සාගරික විද්‍යාපීඨ ශ්‍රවණාගාරයේදී, සිදුකෙරිණි.

ශ්‍රී ලංකා නාවික හමුදාවේ විශේෂ යාත්‍රා බලඝණයේ 32 වන බඳවා ගැනීමේ පුහුණුව සාර්ථකව සම්පූර්ණ කළ නිලධාරීන් දෙදෙනෙක් (02) සහ නාවිකයන් තිස් හතර දෙනෙක් (34) විසිරයාම සහ ලාංඡන පැළඳවීම, එම බලඝණයේ අණදෙන නිලධාරි, කොමාණ්ඩර් ලක්මාල් වීරක්කොඩි ගේ ආරාධනයෙන් නාවික හමුදාධිපති, වයිස් අද්මිරාල් කාන්චන බානගොඩ ගේ ප්‍රධානත්වයෙන් සහ නාවික හමුදා සේවා වනිතා ඒකකයේ ගරු සභාපතිණී, අනූෂා බානගොඩ මැතිණියගේ සහභාගීත්වයෙන් 2025 මාර්තු මස 22 වැනි දින ත්‍රිකුණාමලය, නාවික තඨාකාංගනයේ විශේෂ යාත්‍රා බලඝණ මූලස්ථානයේදී සිදු කෙරිණි.