ශ්‍රී ලංකා නාවික හමුදාව, 2026 මැයි මස 05 වැනි දින පුත්තලම පෙරියපාඩු ප්‍රදේශයේ සිදුකළ විශේෂ සෝදිසි මෙහෙයුමක් මඟින්, නීතී විරෝධී ලෙස මෙරටට රැගෙනවිත් ප්‍රවාහනය කිරීමට සූදානම් කර තිබූ බීඩි කොළ කිලෝ ග්‍රෑම් හයසිය දහඅටක (618) පමණ තොගයක් රැගත් කැබ් රථයක් (01) සමඟ සැකකරුවන් දෙදෙනෙකු (02) නාවික හමුදා භාරයට ගැනීමට කටයුතු කෙරිණි.

ශ්‍රී ලංකා නාවික හමුදා නිලධාරීන්ගේ සන්නිවේදන ශිල්පීය කුසලතා නව මානයක් කරා යොමු කිරීමේ අරමු‍ණින් කොළඹ ටෝස්ට්මාස්ටර්ස් සමාජයේ මෙහෙයවීමෙන් විශේෂ පුහුණු වැඩමුළුවක් 2026 මැයි මස 02 වැනි දින දකුණු විධාන භාර ආඥාපති රියර් අද්මිරාල් ධම්මික විජේවර්ධනගේ ප්‍රධානත්වයෙන් සාර්ථකව පැවැත්විය.

මෙහෙයුම් අවශ්‍යතා සපුරා ගැනීම සඳහා 2026 මැයි මස 04 වැනි දින ඉන්දිය නාවික හමුදාවට අයත් ‘INS SINDHUKESARI’ සබ්මැරීනය දිවයිනට පැමිණි අතර, අද දින (2026 මැයි 06) එම සබ්මැරීනය දිවයිනෙන් පිටත් විය. ‘INS SINDHUKESARI’ සබ්මැරීනය වෙත ශ්‍රී ලංකා නාවික හමුදාව විසින් නාවික හමුදා සම්ප්‍රදායානුකූලව සමුදීම කොළඹ වරායේදී සිදු කෙරිණි.

ශ්‍රී ලංකා නාවික නෞකා එලාර ආයතනයේ මෙහෙයුම් හා සන්නිවේදන කටයුතු වඩාත් කාර්යක්‍ෂමව සිදුකිරීම සඳහා මෙහෙයුම් මැදිරියක්, ප්‍රධාන සංඥා කාර්යාලයක් සහ දුරකථන හා දත්ත හුවමාරු මධ්‍යස්ථානයක් ඇතුළුව ඉදිකරන ලද නව ගොඩනැගිල්ල 2026 මැයි මස 02 වන දින නාවික හමුදාධිපති වයිස් අද්මිරාල් කාන්චන බානගොඩගේ ප්‍රධානත්වයෙන්, උතුරු නාවික විධාන ආඥාපති රියර් අද්මිරාල් බුද්ධික ලියනගමගේ ගේ සහභාගීත්වයෙන් විවෘත කෙරිණි.

නාවික හමුදාධිපති, වයිස් අද්මිරාල් කාන්චන බානගොඩ, 2026 මැයි මස 01 සිට 03 දින දක්වා උතුරු නාවික විධානයේ නිල සංචාරයක නිරත වෙමින්, එම විධානයේ මෙහෙයුම්, පරිපාලන, සංවර්ධන සහ සුභසාධන ව්‍යාපෘති නිරීක්‍ෂණය කර, නාවික හමුදාවේ මෙහෙයුම් අභිප්‍රාය පිළිබඳව එම විධානයේ නිලධාරීන් සහ නාවිකයන් දැනුවත් කෙරිණි.

ඉන්දියානු නාවික හමුදාවට අයත් කිමිදුම් මෙහෙයුම් සහයක නෞකාවක් වන ‘INS NIREEKSHAK’ නෞකාව 2026 අප්‍රේල් මස 21 වන දින දිවයිනට පැමිණි අතර, එම නෞකාවේ නාවිකයන් පිරිසක් සමඟ ශ්‍රී ලංකා නාවික හමුදාවේ කිමිදුම් කණ්ඩායමක්, කොළඹට ඔබ්බෙන් වූ මුහුදු ප්‍රදේශයේ 2026 අප්‍රේල් මස 21 සිට 28 වන දින දක්වා කිමිදුම් අභ්‍යාසයක් සාර්ථකව පවත්වන ලදී.

ඉන්දීය නාවික හමුදාවට අයත් ‘INS SINDHUKESARI’ සබ්මැරීනය මෙහෙයුම් අවශ්‍යතා සපුරා ගැනීමේ අරමුණින් 2026 මැයි මස 03 උදෑසන කොළඹ වරායට පැමිණි අතර, ශ්‍රී ලංකා නාවික හමුදාව විසින් එය නාවික සම්ප්‍රදායානුකූලව උණුසුම් ලෙස පිළිගනු ලැබීය.

ඉන්දියානු නාවික හමුදාවට අයත් ‘INS NIREEKSHAK’ නෞකාව පුහුණු වැඩසටහනක් සඳහා 2026 අප්‍රේල් මස 21 වැනි දින දිවයිනට පැමිණි අතර, පුහුණු වැඩසටහන අවසන් කරමින්, එම නෞකාව 2026 අප්‍රේල් මස 28 වැනි දින දිවයිනෙන් පිටත් විය. ‘INS NIREEKSHAK’ නෞකාව වෙත ශ්‍රී ලංකා නාවික හමුදාව විසින් නාවික හමුදා සම්ප්‍රදායානුකූලව සමුදීම කොළඹ වරායේදී සිදු කෙරිණි.

ශ්‍රී ලංකා නාවික හමුදාවේ 263 වැනි බඳවා ගැනීමට අයත් නිත්‍ය ආධුනික නාවිකයන් දෙසීය තිහක් (230) සහ ස්වේච්ඡා ආධුනික නාවිකයන් එකසිය හතලිස් තුනක් (143) ඇතුළු ආධුනික නාවිකයින් තුන්සීය හැත්තෑ තුන් දෙනෙකු (373) සිය මූලික පුහුණුව සාර්ථකව අවසන් කර, අද (2026 අප්‍රේල් 27) ගාල්ල, බූස්ස ශ්‍රී ලංකා නාවික නෞකා නිපුණ ආයතනයේ ප්‍රධාන සරඹ පිටියේ දී විසිර යාම සිදුකෙරිණි. ශ්‍රී ලංකා නාවික නෞකා නිපුණ ආයතනයේ ආඥාපති සහ අණදෙන නිලධාරී, කපිතාන් රසික පියසේනගේ ආරාධනයෙන්, මෙම විසිර යාමේ පෙළපාලියේ ප්‍රධාන ආරාධිත අමුත්තා ලෙස, අධ්‍යක්‍ෂ ජෙනරාල් සෞඛ්‍ය හා සේවා, රියර් අද්මිරාල් ජනක මාරඹගේ සහභාගී විය.

ශ්‍රී ලංකා නාවික හමුදාධිපති වයිස් අද්මිරාල් කාන්චන බානගොඩ, 2026 අප්‍රේල් මස 18 සහ 19 දෙදින වයඹ නාවික විධානයේ නිල සංචාරයක නිරත වෙමින් එම විධානයේ මෙහෙයුම්, පරිපාලන, සුභසාධන හා කෘෂි ව්‍යාපෘති කටයුතු නිරීක්‍ෂණය කර, එම කටයුතු වඩාත් කාර්යක්‍ෂම හා ඵලදායී ලෙස ඉටු කිරීම සඳහා අවශ්‍ය උපදෙස් ලබා දීම සිදුකෙරිණි.