නාවික හමුදා උත්තමාචාර මැද රියර් අද්මිරාල් ප්‍රශාන්ත ඇන්තනී නාවික හමුදා සේවයෙන් විශ්‍රාම ලබයි
ශ්‍රී ලංකා නාවික හමුදාවේ වසර 34 කට අධික සේවා කාලයක් නිම කරමින් රියර් අද්මිරාල් ප්‍රශාන්ත ඇන්තනී අද දින (2025 මාර්තු 17) නාවික හමුදා සේවයෙන් විශ්‍රාම ලැබීම සිදු කෙරිණි.
නාවික හමුදාධිපති වයිස් අද්මිරාල් කාන්චන බානගොඩ ප්‍රමුඛ නාවික හමුදා කළමනාකරණ මණ්ඩලය විසින් අද දිනට සිය 55 වන උපන් දිනය යෙදී ඇති රියර් අද්මිරාල් ප්‍රශාන්ත ඇන්තනී වෙත නාවික හමුදා මූලස්ථානයේදී උපන් දින සුබපැතුම් පිරිනැමීමෙන් අනතුරුව, නාවික හමුදා සම්ප්‍රදායානුකූලව විශේෂ සම්මාන මුරයක් මඟින් ඔහු වෙත උත්තමාචාරය පුද කිරීම සිදු කෙරිණි. අනතුරුව, සහෘද නිලධාරීන් විසින් සමුදීමෙන් පසු නාවික හමුදා රථ පෙළපාලියකින් නාවික හමුදා මූලස්ථානයෙන් පිටව යන මොහොතේ ජ්‍යේෂ්ඨ සහ කණිෂ්ඨ නාවිකයින් රියර් අද්මිරාල් ප්‍රශාන්ත ඇන්තනී වෙත නාවික හමුදා සම්ප්‍රදායානුකූලව සුභාශිංසන පිරිනැමීම සිදුකෙරිණි.
1990 වසරේදී 20 වන බඳවා ගැනීමට අයත් ශිෂ්‍යභට නිලධාරියෙකු ලෙස නාවික හමුදා සේවයට එක්ව ඇති රියර් අද්මිරාල් ප්‍රශාන්ත ඇන්තනී, සිය වසර 34 කට අධික සේවා කාලය තුළ කපිතාන් විදුලි දෙපාර්තමේන්තුව (උතුර), කපිතාන් විදුලි දෙපාර්තමේන්තුව (බටහිර), කොමදෝරු විදුලි හා විද්‍යුත් දෙපාර්තමේන්තුව (බටහිර), නියෝජ්‍ය අධ්‍යක්‍ෂ නාවික විදුලි ( විද්‍යුත් හා දුරකථන) සහ නියෝජ්‍ය අධ්‍යක්‍ෂ සමුද්‍රීය අවේක්‍ෂණ, කපිතාන් විදුලි දෙපාර්තමේන්තුව (දකුණ), කොමදෝරු විදුලි දෙපාර්තමේන්තුව (නැගෙනහිර), කොමදෝරු විදුලි හා විද්‍යුත් ඉංජිනේරු දෙපාර්තමේන්තුව (නැගෙනහිර), ප්‍රධානී සයිබර් ආරක්‍ෂක ඒකකය, අධ්‍යක්‍ෂ නාවික විදුලි පරිපාලන සහ ජීව වෛද්‍ය ඉංජිනේරු, අධ්‍යක්‍ෂ නාවික විදුලි උපයෝගීතා හා ජීව වෛද්‍ය ඉංජීනේරු සහ අධ්‍යක්‍ෂ නාවික විද්‍යුත් හා දුරකථන ඉංජිනේරු සහ අධ්‍යක්‍ෂ ජෙනරාල් විදුලි හා විද්‍යුත් ඉංජිනේරු යන ප්‍රමුඛ නිලතල දරමින් කටයුතු කර ඇති කීර්තිමත් ජ්‍යේෂ්ඨ නිලධාරියෙකි.
